¹ Khona wehlela eDerbe naseListra . Bheka, kwakukhona lapho umfundi othile, nguThimothewu igama lakhe , indodana yowesifazane wakwaJuda okholiweyo, kepha uyise wayengumGreki, ² owayefakazelwa kahle ngabazalwane baseListra nabase-Ikoniyu. ³ Lowo uPawulu wathanda ukuba ahambe naye, wamthatha, wamsoka ngenxa yabaJuda ababekhona kulezo zindawo ; ngokuba bonke babemazi ukuthi uyise wayengumGreki. ⁴ Kwathi bedabula imizi , babanika izinqumo ezanqunywa ngabaphostoli namalunga aseJerusalema ukuba bazigcine. ⁵ Njalo-ke amabandla aqiniswa ekukholweni , anda ngobuningi imihla ngemihla. ⁶ Base bedabula izwe laseFrigiya nelaseGalathiya , benqatshelwe nguMoya oNgcwele ukulikhuluma izwi e-Asiya; ⁷ sebefikile ngaseMisiya , balinga ukuya eBithiniya , kepha uMoya kaJesu akabavumelanga. UPawulu uwelela eMakedoniya ⁸ Badlula eMisiya, behlela eTrowa. ⁹ Kwabonakala kuPawulu umbono ebusuku ; indoda ethile yaseMakedoniya eyayimi imncenga yathi: Welela eMakedoniya, usisize. ¹⁰ Lapho esewubonile umbono , safuna masinyane ukuya eMakedoniya , sathi uNkulunkulu usibizile ukuba sibashumayeze ivangeli. ¹¹ Khona samuka eTrowa ngomkhumbi , saqonda eSamotrake , ngangomuso safika eNeyapholi. UPawulu ushumayela eFilipi; ukukholwa kukaLidiya ¹² Sisuka lapho saya eFilipi elingumuzi oyikhanda lesifunda saseMakedoniya , ikoloni. Kulowo muzi sahlala izinsuku ezithile. ¹³ Ngosuku lwesabatha saphumela ngaphandle kwesango ngasemfuleni, lapho sathi babevama ukukhuleka khona ; sahlala phansi , sakhuluma kubo abesifazane ababebuthene. ¹⁴ Owesifazane othile ogama lakhe linguLidiya , engumthengisi wezibubende, wasemzini waseThiyathira, okhonza uNkulunkulu, walalela, iNkosi yayivula inhliziyo yakhe ukuba aqaphele okwakhulunywa nguPawulu. ¹⁵ Kuthe esebhapathiziwe kanye nendlu yakhe , wasincenga wathi: Uma nithi ngikholekile eNkosini, ngenani endlini yami, nihlale khona, wasicindezela. UPawulu uyaboshwa ¹⁶ Kwathi siya endaweni yokukhuleka , kwahlangana nathi intombazana enomoya wobungoma, eyayitholela abaniniyo inzuzo enkulu ngokubhula. ¹⁷ Yona yamlandela uPawulu nathi, yamemeza yathi: Laba bantu bayizinceku zikaNkulunkulu oPhezukonke ezimemezela kini indlela yensindiso. ¹⁸ Yakwenza lokho izinsuku eziningi . Kepha uPawulu esecasukile waphenduka, wathi kumoya : Ngiyakuyala egameni likaJesu Kristu ukuba uphume kuyo. Wayesephuma ngaso leso sikhathi. ¹⁹ Kwathi abaniniyo sebebonile ukuthi ithemba lenzuzo yabo limukile, bababamba oPawulu noSila, babahudulela esigcawini phambi kwababusi, ²⁰ babayisa ezinduneni , bathi: Laba bantu banyakazisa umuzi wakithi bengabaJuda; ²¹ bafundisa imikhuba esingavunyelwe ukuba siyam ukele, siyenze thina esingamaRoma. ²² Isixuku sase sibavukela , nezinduna zayala ukuba bahlutshulwe izingubo , bashaywe ngenduku; ²³ sezibashayile imivimbo eminingi , zabaphonsa etilongweni , zayala umgciniziboshwa ukuba abagcine impela; ²⁴ yena eyaliwe kanjalo wabaphonsa etilongweni elingaphakathi, wabopha izinyawo zabo ogongolweni. Ukuphenduka komgciniziboshwa ²⁵ Kepha phakathi kobusuku oPawulu noSila bekhuleka bamdumisa uNkulunkulu ngamahubo, iziboshwa zabezwa; ²⁶ kwavela ngokuzuma ukuzamazama komhlaba okukhulu , kwaze kwazanyazanyiswa izisekelo zetilongo ; kwavuleka khona lapho iminyango yonke, kwathukuluka nezibopho zabo bonke. ²⁷ Kwathi umgciniziboshwa ephaphama , wabona iminyango yetilongo ivulekile; wayesehosha inkemba efuna ukuzibulala, ngokuba wathi iziboshwa ziphunyukile. ²⁸ Kepha uPawulu wamemeza ngezwi elikhulu , wathi: Ungazilimazi, ngokuba sikhona sonke. ²⁹ Wayesebiza izibani , wagijimela phakathi ethuthumela , wawa phansi phambi kukaPawulu noSila, ³⁰ wabakhiphela ngaphandle , wathi: Makhosi, ngimelwe ukwenzani ukuba ngisindiswe na? ³¹ Bona bathi : Kholwa yiNkosi uJesu , yikhona uzakusindiswa wena nendlu yakho. ³² Base bemshumayeza izwi likaNkulunkulu , yena nabo bonke ababesendlini yakhe. ³³ Wabathatha ngaso leso sikhathi sasebusuku , wabageza imivimbo , wabhapathizwa khona lapho, yena nabo bonke abakhe, ³⁴ wabenyusela endlini, wababekela ukudla, wathokoza kanye nendlu yakhe yonke ngokukholwa nguNkulunkulu. ³⁵ Kepha sekusile, izinduna zathuma izikhonzi, zathi: Bakhulule labo bantu. ³⁶ Umgciniziboshwa wabikela uPawulu law o mazwi , wathi: Izinduna zithumele ukuba nikhululwe. Ngakho phumani manje, nihambe ngokuthula. ³⁷ Kepha uPawulu wathi kuzo : Basishayile phambi kwabantu singalahlwanga cala, thina singabantu abangamaRoma , basiphonsa etilongweni ; manje basikhipha ngasese na? Qhabo, akuze bona, basikhiphe. ³⁸ Izikhonzi zabikela izinduna lawo mazwi . Zona zesaba sezizwa ukuthi bangamaRoma, ³⁹ zeza zabancenga; sezibakhiphile zabanxusa ukuba bamuke emzini. ⁴⁰ Base bephuma etilongweni, bangena kwaLidiya ; kwathi sebebabonile abazalwane babaduduza, bamuka.